પાણી ભરાવા, ટ્રાફિક અવરોધ, અકસ્માતો અને અન્ય આપત્તિજનક પરિસ્થિતિઓને ટાળવા પ્રિ-મોન્સૂન કામગીરીને ઝડપી બનાવવામાં આવી

(સંપૂર્ણ સમાચાર સેવા)
અમદાવાદ, તા.૮ મે ૨૦૨૬ — રાજ્યની તમામ મહાનગરપાલિકાઓ તેમજ સ્થાનિક સ્વરાજ્યની સંસ્થાઓને આગામી ૧૫ જૂન પહેલાં ‘પ્રિ-મોન્સૂન એક્શન પ્લાન’ અંતર્ગત તમામ કામગીરી પૂર્ણ કરવા માટે કડક સૂચનાઓ આપવામાં આવી છે. ચોમાસા દરમિયાન ખાસ કરીને નીચાણવાળા વિસ્તારોમાં પાણી ભરાવાની સમસ્યા સૌથી મોટી ચિંતા બની રહેતી હોય છે. આ સમસ્યાના નિવારણ માટે મ્યુનિસિપલ કોર્પોરેશનો દ્વારા શહેરના નાના-મોટા વરસાદી વોંકળા, કેનાલો અને ડ્રેનેજ લાઈનોની સફાઈ કામગીરીને વેગ આપવામાં આવ્યો છે.

ગત વર્ષોમાં જ્યાં વધુ વોટરલોગિંગની ફરિયાદો નોંધાઈ હતી તેવા વિસ્તારોમાં ખાસ ધ્યાન કેન્દ્રિત કરવામાં આવ્યું છે. ડ્રેનેજ લાઈનોમાંથી કચરો અને કાંપ દૂર કરવાની કામગીરી યુદ્ધના ધોરણે ચાલી રહી છે. જ્યાં જરૂરી જણાશે ત્યાં પહેલાથી જ વોટર પંપ ગોઠવવાની વ્યવસ્થા કરવામાં આવી રહી છે, જેથી ભારે વરસાદ દરમિયાન પાણીનો નિકાલ ઝડપથી થઈ શકે. શહેરોમાં વરસાદી પાણીના પ્રવાહમાં કોઈ અવરોધ ન સર્જાય તે માટે સંબંધિત વિભાગોને સતત મોનિટરિંગ રાખવા સૂચના આપવામાં આવી છે.

ચોમાસા દરમિયાન ભારે પવન અને વાવાઝોડા જેવી પરિસ્થિતિઓમાં અકસ્માતો ન બને તે માટે સુરક્ષાત્મક પગલાં પણ લેવામાં આવી રહ્યા છે. જોખમી વૃક્ષોની છાંટણી શરૂ કરવામાં આવી છે, જ્યારે રસ્તાઓ પર લગાવવામાં આવેલા જોખમી હોર્ડિંગ્સની તપાસ કરીને તેને ઉતારી લેવા માટે આદેશ આપવામાં આવ્યા છે. અમદાવાદ, વડોદરા, સુરત અને રાજકોટ સહિતના મહાનગરોમાં જર્જરિત મકાનો સામે પણ તંત્ર સક્રિય બન્યું છે. જોખમી ઇમારતોને નોટિસ પાઠવી ખાલી કરાવવાની તેમજ જરૂર જણાય ત્યાં તોડી પાડવાની પ્રક્રિયા શરૂ કરવામાં આવી છે. સાથે જ વીજળીના થાંભલા અને વાયરોનું મેન્ટેનન્સ કરીને શોર્ટ સર્કિટ જેવી ઘટનાઓ અટકાવવા પણ આયોજન હાથ ધરાયું છે.

રાજ્ય સરકાર દ્વારા આગામી ૧ જૂનથી તમામ મહાનગરોમાં ૨૪ કલાક કાર્યરત રહે તેવા મોન્સૂન કંટ્રોલ રૂમ શરૂ કરવાનો નિર્ણય લેવામાં આવ્યો છે. આ કંટ્રોલ રૂમ વરસાદી પરિસ્થિતિ, પાણી ભરાવા અને ઇમરજન્સી સ્થિતિ પર સતત નજર રાખશે. ઉપરાંત રેસ્ક્યુ ટીમોની સજ્જતા ચકાસવા માટે મોકડ્રિલ પણ યોજાશે, જેથી પૂર અથવા આપત્તિના સમયે તાત્કાલિક કામગીરી કરી શકાય. સરકારના ઉચ્ચ સ્તરે સ્પષ્ટ સૂચના આપવામાં આવી છે કે નાગરિકોની સુરક્ષા સર્વોચ્ચ પ્રાથમિકતા છે અને તમામ મનપા કમિશનરોને ૧૫ જૂન સુધીમાં સફાઈ તેમજ સુરક્ષા સંબંધિત કામગીરી ૧૦૦ ટકા પૂર્ણ કરવા માટે કહેવામાં આવ્યું છે.

The post વહેલી તકે પ્રિ-મોન્સૂન કામગીરી પૂર્ણ કરવા સરકારનો આદેશ appeared first on Police Story.

વિભાગે ચેતવણી આપી છે કે, તમામ વાહન માલિકો એક મહિનાની અંદર જાતિસૂચક શબ્દો અથવા સ્ટીકરો હટાવી દે

(સંપૂર્ણ સમાચાર સેવા)
નવી દિલ્હી, તા.૮ મે ૨૦૨૬ — આમ તો સામાન્ય રીતે વાહન પર રજીસ્ટ્રેશન નંબર પ્લેટ અને જે-તે વાહન કંપનીનું નામ હોય છે, જ્યારે અન્ય કોઈ શબ્દો લખવા ગુનો બને છે. હાલના સમયમાં અનેક વાહનો પર જાતિસૂચક શબ્દો લખાયેલા જોવા મળે છે, ત્યારે હવે આવા શબ્દો વાહન પર લખાયેલા જોવા મળશે તો કડક દંડ ફટકારવાનો આદેશ અપાયો છે.

બિહારમાં પરિવહન વિભાગે તમામ વાહનો પરથી જાતિસૂચક શબ્દો હટાવવાનો કડક નિર્દેશ આપ્યો છે અને વાહન ચાલક નિયમનું ઉલ્લંઘન કરે તો બે હજાર રૂપિયાનો દંડ ફટકારવાનો આદેશ અપાયો છે. વિભાગે ચેતવણી આપી છે કે, તમામ વાહન માલિકો એક મહિનાની અંદર જાતિસૂચક શબ્દો અથવા સ્ટીકરો હટાવી દે. ત્યારપછી પોલીસ વિશેષ અભિયાન હાથ ધરીને તમામ વાહનોની કડકાઈથી તપાશ કરશે અને ઉલ્લંઘન કરનારને કડક દંડ ફટકારશે. આદેશમાં સ્પષ્ટ કહેવાયું છે કે, નિયમોનું ઉલ્લંઘન કરનારા વાહન માલિકોને મોટર અધિનિયમ-૧૯૮૮ની કલમ ૧૭૭ અને ૧૭૯ હેઠળ બે હજાર રૂપિયાનો દંડ ફટકારવામાં આવશે. વિભાગે તમામ વાહન માલિકોને નિયમોનું પાલન કરવા અપીલ કરી છે. ઉલ્લેખનીય છે કે, ભારતમાં વાહનો પર જાતિસૂચક શબ્દો લખવા કે સ્ટીકરો લગાવવાનું ભારે ઘેલું છે, તેથી જ વિભાગ દ્વારા આવા કડક આદેશ જાહેર કરવામાં આવે છે. બિહાર પરિવિભાગે જાતિસૂચક શબ્દો હટાવવાનું કડકાઈથી પાલન કરવા માટે એઆઈ કેમેરાથી સજ્જ ટ્રાફિક મેનેજમેન્ટ સિસ્ટમ પર ઝડપી કામગીરી હાથ ધરી દીધી છે.

આ માટે આખા રાજ્યમાં ૭૦૦ સ્થળો પર એઆઈ કેમેરાથી સજ્જ ઈન્ટેલિજન્સ ટ્રાફિક મેનજેમેન્ટ સિસ્ટમ  (ITMS) લગાવવામાં આવશે. અધિકારીઓએ કહ્યું કે, આ માટે સ્થળોની પસંદગીની કામગીરી ટૂંક સમયાં શરૂ કરાશે.

The post વાહનો પર જાતિસૂચક શબ્દો લખશો તો થશે મોટો દંડ appeared first on Police Story.

ભારતીય સેટઅપમાં કેટલાક ખેલાડીઓ ગંભીરની મેનેજમેન્ટ શૈલી અને મજબૂત વ્યક્તિત્વથી નાખુશ છે

(સંપૂર્ણ સમાચાર સેવા)
નવી દિલ્હી, તા.૮ મે ૨૦૨૬ — ગૌતમ ગંભીર જુલાઈ ૨૦૨૪માં ટીમ ઈન્ડિયામાં મુખ્ય કોચ તરીકે જોડાયા હતા. તેમના કોચિંગ હેઠળ, ભારતે સતત બે ICC ટ્રોફી જીતી હતીઃ ચેમ્પિયન્સ ટ્રોફી અને ૨૦૨૬ T20 વર્લ્ડ કપ. ગંભીરના કોચિંગથી સેમસન જેવા ખેલાડીઓને તકો મળી, જ્યારે ઇશાન કિશન જેવા ખેલાડીઓનો પણ પ્રવેશ થયો, જેઓ સતત ઘરેલુ ક્રિકેટમાં ધૂમ મચાવી રહ્યા છે.

જોકે, તેમના કાર્યકાળ દરમિયાન અનેક વિવાદાસ્પદ અહેવાલો પણ સામે આવ્યા. વિરાટ કોહલી અને રોહિત શર્મા જેવા સિનિયર ખેલાડીઓએ કોચિંગ દરમિયાન અચાનક ટેસ્ટ ક્રિકેટમાંથી નિવૃત્તિ લઈ લીધી. હવે, ભૂતપૂર્વ ક્રિકેટર અતુલ વાસને આરોપ લગાવ્યો છે કે ગંભીરના કોચિંગ હેઠળ બધા ખેલાડીઓ ખુશ નથી. એક શોમાં બોલતા, વાસને આરોપ લગાવ્યો કે ભારતીય સેટઅપમાં કેટલાક ખેલાડીઓ ગંભીરની મેનેજમેન્ટ શૈલી અને મજબૂત વ્યક્તિત્વથી નાખુશ છે. મને ખાતરી છે કે બધા ખેલાડીઓ ખુશ નથી હોતા. કોઈને તો સોય પર સૂવું પડે છે, એવું થાય છે. વ્યક્તિગત પસંદ અને નાપસંદ, અને તે પણ આવા મજબૂત વ્યક્તિત્વ સાથે. વાસને કહ્યું કે વ્યક્તિગત પસંદ અને નાપસંદ સાથે અને તેમને લાકડીથી દોરીને, જો તમે જીતતા રહો છો, તો તે ઠીક છે. પરંતુ જો તમે હારી જાઓ છો, તો તમારે ટીકાનો સામનો કરવો પડશે,”

ભારતના ભૂતપૂર્વ ઝડપી બોલરને પછી પૂછવામાં આવ્યું કે શું તે વ્યક્તિગત રીતે કોઈ એવા ખેલાડીઓને ઓળખે છે જે ગંભીરના નેતૃત્વથી નાખુશ હતા. નામ આપવાનો ઇનકાર કરતા, વાસને સંકેત આપ્યો કે કેટલાક ક્રિકેટરો હતા જેમને લાગ્યું કે તેમને બાજુ પર રાખવામાં આવ્યા છે.

તેમણે આગળ કહ્યું કે, હું તેમાંથી ૧-૨ને જાણું છું, તેઓ ખુલ્લેઆમ તે કહેશે નહીં. હું આ શોમાં તેમના નામ જાહેર કરી શકતો નથી. બધા જાણે છે કે શું ચાલી રહ્યું છે. પરંતુ તે ૨-૪ ખેલાડીઓને બાજુ પર રાખ્યા પછી, જો તમે જીતો છો, તો તે તમારી દુનિયા છે. આ એક ટીમ રમત છે, કોઈ ખેલાડીઓનું સાંભળશે નહીં. આ બધા પછી જો કોચ જીતે છે, તો કોચ સાચો છે, અને ખેલાડીઓ ખોટા છે.

વાસન અને ગંભીર વચ્ચે ભૂતકાળમાં તણાવપૂર્ણ સંબંધો રહ્યા છે. જ્યારે વાસન દિલ્હીના સિલેક્ટર હતા, ત્યારે ગંભીરને દિલ્હીના કેપ્ટન પદેથી દૂર કરવામાં આવ્યા હતા, આ પગલાથી વિવાદ થયો હતો જ્યારે ભારતના ભૂતપૂર્વ ઓપનરે દાવો કર્યો હતો કે તેમને નિર્ણય વિશે યોગ્ય રીતે જાણ કરવામાં આવી ન હતી.

The post ગૌતમ ગંભીરના કોચિંગથી બધા ખેલાડીઓ ખુશ નથી appeared first on Police Story.

શેરબજારમાં નબળાઈનું સૌથી મોટું કારણ SBI ના ત્રિમાસિક પરિણામો પછી બેંકિંગ શેરોમાં વેચવાલી હતી

(સંપૂર્ણ સમાચાર સેવા)
મુંબઈ, તા.૮ મે ૨૦૨૬ — આજે ભારતીય શેરબજારમાં ભારે અસ્થિરતા વચ્ચે ઘટાડો જોવા મળ્યો હતો. ટ્રેડિંગ સેશનના અંતે સેન્સેક્સ લગભગ ૫૧૬ પોઈન્ટ ઘટ્યો હતો, જ્યારે નિફ્ટી ૨૪,૨૦૦ ની નીચે સરકી ગયો હતો. નબળાઈનું સૌથી મોટું કારણ  SBI ના ત્રિમાસિક પરિણામો પછી બેંકિંગ શેરોમાં વેચવાલી હતી. વધુમાં, યુએસ-ઈરાન તણાવે પણ રોકાણકારોની ચિંતા વધારી હતી. ટ્રેડિંગના અંતે સેન્સેક્સ ૫૧૬ પોઈન્ટ ઘટીને ૭૭,૩૨૮ પર બંધ થયો હતો, જ્યારે નિફ્ટી ૧૫૦ પોઈન્ટ ઘટીને ૨૪,૧૭૬ પર બંધ થયો હતો.

સ્ટેટ બેંક ઓફ ઈન્ડિયા (SBI) ના ત્રિમાસિક પરિણામો પછી રોકાણકારોએ ભારે પ્રોફીટ-બુકિંગનો આશરો લીધો હતો. આ અસર શેર પર સ્પષ્ટપણે દેખાઈ હતી અને SBI ના શેરમાં લગભગ ૬ ટકાનો ઘટાડો થયો હતો. આના કારણે સમગ્ર બેંકિંગ ક્ષેત્ર પર દબાણ આવ્યું હતું. SBI ઉપરાંત, કોલ ઈન્ડિયા, HDFC બેંક, બજાજ ફાઇનાન્સ અને એક્સિસ બેંકના શેરમાં પણ નિફ્ટીમાં ઘટાડો જોવા મળ્યો હતો. એશિયન પેઇન્ટ્‌સ, એપોલો હોસ્પિટલ્સ, ટાટા કન્ઝ્યુમર, અદાણી પોર્ટ્‌સ અને ટાઇટનમાં પણ ખરીદી જોવા મળી હતી.

આજે બજારમાં PSU બેંક ઇન્ડેક્સ સૌથી વધુ ઘટ્યો, લગભગ ૩ ટકા ઘટ્યો. ઓઇલ અને ગેસ ઇન્ડેક્સમાં પણ ૧ ટકાનો ઘટાડો થયો જ્યારે ખાનગી બેંકો, ધાતુઓ, ઉર્જા, વીજળી અને રિયલ્ટી ક્ષેત્રો પણ નબળા પડ્યા. જોકે, IT, FMCG,, આરોગ્ય સંભાળ અને કન્ઝયૂમર ડ્યૂરેબલ ક્ષેત્રો બજારને કંઈક અંશે સ્થિર કરવામાં સફળ રહ્યા.

નિષ્ણાતોના મતે, યુએસ અને ઈરાન વચ્ચે વધતા તણાવ અને સ્ટ્રેટ ઓફ હોર્મુઝ નજીક લશ્કરી પ્રવૃત્તિએ વૈશ્વિક બજારોમાં ભયનું વાતાવરણ ઉભું કર્યું છે. આના કારણે રોકાણકારો જોખમી રોકાણ ટાળવા લાગ્યા છે, જેના કારણે વેચાણમાં વધારો થયો છે. જોકે, રાહતની વાત એ છે કે ક્રૂડ ઓઇલના ભાવ પ્રતિ બેરલ $100 ની આસપાસ સ્થિર રહ્યા જેનાથી બજારમાં વધુ ગભરાટ અટક્યો.

મુખ્ય પ્રવાહના બજારમાં ઘટાડા છતાં મિડકેપ અને સ્મોલકેપ શેરોમાં વધુ નબળાઈ જોવા મળી નહીં. નિફ્ટી મિડકેપ ઇન્ડેક્સ થોડો ઘટાડો સાથે બંધ થયો, જ્યારે સ્મોલકેપ ઇન્ડેક્સમાં થોડો વધારો થયો. નિષ્ણાતો કહે છે કે મજબૂત કોર્પોરેટ પરિણામો અને સારા મૂલ્યાંકનને કારણે રોકાણકારોનો રસ હજુ પણ પસંદગીના મિડ અને સ્મોલકેપ શેરોમાં રહે છે.

The post શેર બજારમાં મોટો ઘટાડો! સેન્સેક્સ ૫૧૬ પોઈન્ટ તૂટ્યો appeared first on Police Story.

ભાજપે આઝાદી બાદ પ્રથમવાર વિધાનસભા ચૂંટણીમાં બહુમતી મેળવી છે, પશ્ચિમ બંગાળમાં સુવેન્દુ અધિકારી પ્રથમવાર ભાજપ તરફથી મુખ્યમંત્રી બનશે

(સંપૂર્ણ સમાચાર સેવા)
કોલકત્તા, તા.૮ મે ૨૦૨૬ —  પશ્ચિમ બંગાળમાં આખરે ભારતીય જનતા પાર્ટીએ નવા મુખ્યમંત્રીના નામની જાહેરાત કરી દીધી છે. ભાજપ નેતા સુવેન્દુ અધિકારી રાજ્યના નવા મુખ્યમંત્રી બનશે. કોલકત્તામાં યોજાયેલી ધારાસભ્ય દળની બેઠકમાં અધિકારીના નામની જાહેરાત કરવામાં આવી છે. ૯ મેએ સવારે ૧૧ કલાકે અધિકારી બંગાળના મુખ્યમંત્રી તરીકે શપથ લેશે.અધિકારીના મંત્રીમંડળમાં કોણ સામેલ થશે હજુ તેના નામ સામે આવ્યા નથી.

પશ્ચિમ બંગાળ વિધાનસભા ચૂંટણીમાં ભારતીય જનતા પાર્ટીએ ઐતિહાસિક જીત મેળવી હતી. ચૂંટણીમાં ભાજપે ૨૦૭ સીટો કબજે કરી હતી. ભાજપે આઝાદી બાદ પ્રથમવાર વિધાનસભા ચૂંટણીમાં બહુમતી મેળવી છે. હવે પશ્ચિમ બંગાળમાં સુવેન્દુ અધિકારી પ્રથમવાર ભાજપ તરફથી મુખ્યમંત્રી બનશે.

સુવેન્દુ અધિકારીએ લગ્ન કર્યા નથી. તેમનો જન્મ ૧૫ ડિસેમ્બર ૧૯૭૦ના પૂર્વી મેદિનીપુરના કાંથીમાં થયો હતો. તેમનો પરિવાર રાજનીતિ સાથે જોડાયેલો છે. તેમના પિતા શિશિર અધિકારી બંગાળની રાજનીતિમાં મોટું નામ હતા. અધિકારી પર તેમના પિતાનો પ્રભાવ પડ્યો છે.

તેમણે પોતાના રાજકીય જીવનની શરૂઆત ૧૯૮૯મા કોંગ્રેસના વિદ્યાર્થી સંગઠનથી કરી હતી. તેઓ ૧૯૯૫મા તે સમયે ચર્ચામાં આવ્યા જ્યારે કાંથી નગરપાલિકામાં સભ્ય તરીકે ચૂંટાયા હતા. વર્ષ ૧૯૯૮મા જ્યારે ટીએમસીની શરૂઆત થઈ તો તેમાં જોડાયા હતા. ધીમે-ધીમે તેમણે રાજનીતિમાં પકડ બનાવી લીધી અને એટલા મજબૂત થઈ ગયા કે વર્ષ ૨૦૧૪મા જ્યારે મોદી લહેર હોવા છતાં પોતાની લોકસભા સીટ જીતી હતી. મમતા બેનર્જીએ તેમની ક્ષમતા પર ભરોસો કર્યો અને પરિવહન તથા સિંચાઈ જેવા મહત્વપૂર્ણ મંત્રાલય સોંપ્યા હતા.

૨૦૨૦મા સુવેન્દુ અધિકારીનો ટીએમસી મોહભંગ થઈ ગયો અને તેમણે ૨૦૨૦મા ટીએમસી અને ધારાસભ્ય પદેથી રાજીનામું આપી દીધું હતું. ત્યારબાદ અમિત શાહની હાજરીમાં ભાજપમાં જોડાયા હતા. ત્યારબાદ ૨૦૨૧ની વિધાનસભા ચૂંટણીમાં તેમણે નંદીગ્રામથી મમતા બેનર્જીને હરાવી દીધા હતા. આ જીત બાદ પાર્ટીએ તેમને બંગાળ વિધાનસભામાં વિપક્ષ નેતાની જવાબદારી આપી હતી.

હવે ૨૦૨૬ની વિધાનસભા ચૂંટણીમાં સુવેન્દુ અધિકકારીએ ૨ સીટો (નંદીગ્રામ અને ભવાનીપુર) થી ચૂંટણી લડી અને બંને પર જીત મેળવી છે. તેમણે ભવાનીપુર સીટથી રાજ્યના મુખ્યમંત્રી મમતા બેનર્જીને હરાવ્યા હતા.

પશ્ચિમ બંગાળમાં ભાજપે નવા મુખ્યમંત્રીના નામ પર મહોર લગાવી દીધી છે. શુભેંદુ અધિકારી બંગાળના નવા મુખ્યમંત્રી બનશે. પોસ્ટ ગ્રેજ્યુએટ ડિગ્રી હાસિલ કરનાર અધિકારીએ વિધાનસભા ચૂંટણીમાં નોમિનેશન સમયે ચૂંટણી પંચને આપેલા પોતાના એફિવેડિટમાં નેટવર્થનો ખુલાસો કર્યો અને તેમાં આપવામાં આવેલી જાણકારી પ્રમાણે તેમની કુલ નેટવર્થ ૮૫.૮૭ લાખ રૂપિયા છે. જ્યારે તેમના પર કોઈ દેવું નથી.

ચૂંટણી પહેલા અધિકારીની પાસે ૧૨૦૦૦ રૂપિયા રોકડા અને બેંક ખાતામાં આશરે ૭ લાખ રૂપિયા જમા હોવાની જાણકારી આપી હતી. આ સિવાય અન્ય યોજનામાં તેમણે લાખો રૂપિયાનું રોકાણ કર્યું છે. તેમની પાસે પોસ્ટલ સેવિંગ એકાઉન્ટમાં ૬૦ હજાર રૂપિયા, કિસાન વિકાસ પત્રમાં ૨.૬૦ લાખ રૂપિયા જમા કર્યાં છે. આ સિવાય શેર અને બોન્ડ્‌સમાં આશરે ૧૪૦૦૦ રૂપિયા લગાવ્યા છે. અધિકારી પાસે છ એલઆઈસીની પોલીસી છે. તેમની પોલિસીમાં છ લાખ રૂપિયા જમા છે, જ્યારે અન્ય પાંચ પોલિસીમાં મળી કુલ ૭ લાખનું રોકાણ કર્યું છે. આ સિવાય તેમની પાસે કોઈ સોનું-ચાંદી કે કાર કે બાઇક નથી.

અધિકારીએ લગ્ન કર્યાં નથી. તેમના ભાઈ સૌમેંદુ અધિકારી પણ ભાજપમાં છે. જ્યારે અન્ય ભાઈ ટીએમસી તરફથી સાંસદ રહી ચૂક્યા છે. તેમના પિતા શિશિર અધિકારી પણ રાજનીતિમાં સક્રિય રહ્યાં છે. શિશિર અધિકારી ત્રણ વખત સાંસદ રહી ચૂક્યા છે.

The post શુભેન્દુ અધિકારી બનશે બંગાળના નવા મુખ્યમંત્રી, આજે શપથવિધિ appeared first on Police Story.

અમેરિકામાં ગેસ અને પેટ્રોલની કિંમત વધતાં ત્રણ વર્ષમાં મોંઘવારી સર્વોચ્ચ સપાટીએ છે, યુરોપના ૨૧ દેશોમાં મોંઘવારી વધી હોવાનું લેટેસ્ટ અહેવાલમાં કહેવાયું છે

(સંપૂર્ણ સમાચાર સેવા)
નવી દિલ્હી, તા.૮ મે ૨૦૨૬ — ફ્રેન્ચ ચિંતક મોન્ટેસ્કુનું આ મતલબનું વાક્ય વૈશ્વિક સ્તરે શાંતિ અને વેપારના સંદર્ભમાં વારંવાર ટાંકવામાં આવે છે. બે રાષ્ટ્રોએ વેપાર કરવો હોય તો બંને વચ્ચે શાંતિ અનિવાર્ય છે. યુદ્ધ કે તંગદિલી ચાલતી હોય ત્યારે વેપાર અટકી પડે છે. ભારત-ચીન વચ્ચે દોકલામ સંઘર્ષ થયો તો બંને પક્ષે વેપાર અટકી ગયો. ચીન-અમેરિકા વચ્ચે ટ્રેડ વોર ચાલ્યું તો કરોડોનો વેપાર લટકી પડયો. બધા દેશો એ વાત સમજે છે કે યુદ્ધ અને વેપાર સાથે ચાલી શકે નહીં. વેપાર શરૂ કરવા કે વેપાર વધારવા માટે શાંતિ સ્થાપવી કે શાંતિ જાળવી રાખવી અનિવાર્ય છે. તે વગર વેપાર શક્ય બનતો નથી. જો દુનિયામાં સંઘર્ષ, યુદ્ધ કે અશાંતિ હોય તો વેપાર પ્રભાવિત થાય છે ને એવું જ ઈરાન-અમેરિકા યુદ્ધના કારણે થઈ રહ્યું છે.ઈરાન-અમેરિકા વચ્ચે ચાલી રહેલા ઘર્ષણના કારણે હોર્મુઝની ખાડી હજુય બંધ છે. વિશ્વનો ૨૦-૨૨ ટકા વેપાર હોર્મુઝની ખાડી મારફતે થાય છે. દુનિયામાં ૨૦ ટકા ક્રૂડ હોર્મુઝની ખાડીમાંથી પસાર થાય છે. આ રસ્તો બંધ થતાં દુનિયાના કેટલાય દેશોમાં ક્રૂડની અછત સર્જાવાની ભીતિ છે. ચીન-ભારત-ળાન્સ જેવા કેટલાય દેશો અને સંયુક્ત રાષ્ટ્રસંઘ, યુરોપિયન સંઘ, વર્લ્ડ બેંક, વર્લ્ડ ટ્રેડ ઓર્ગેનાઈઝેશન જેવા અનેક સંગઠનોએ હોર્મુઝની ખાડી ખોલીને વૈશ્વિક વેપાર પૂર્વવત્ કરવાની હિમાયત કરી છે. વર્લ્ડ ઈકોનોમિક ફોરમે તો એક મહિના પહેલાં ચેતવણી આપી હતી કે જો હોર્મુઝને રસ્તે થતો વેપાર ફરીથી શરૂ નહીં થાય તો દુનિયામાં મોંઘવારી વધી જશે….ને હવે એમ જ થયું છે. ઈરાનની હાલત તો શરૂઆતથી જ ખરાબ છે. યુદ્ધમાં ભલે અમેરિકાને ટક્કર આપી હોય, પરંતુ સ્થાનિક સ્તરે મોંઘવારી એટલી બેકાબૂ બની છે કે લોકો પરેશાન થઈ ચૂક્યા છે. ફુગાવાના કારણે ઈરાનની સરકારે વધુ મૂલ્યની નોટો બહાર પાડવી પડી છે. એક કરોડ રિયાલની નોટ પણ બહાર પડી છે, જે ઈરાનના ઈતિહાસમાં સૌથી વધુ રકમની નોટ છે. એક કરોડ રિયાલની કિંમત ભારતના રૂપિયામાં ગણીએ તો માંડ ૬૦૦-૭૦૦ રૂપિયા થાય છે. ઈરાન ભલે અત્યારે દમખમ લગાવીને લડી રહ્યું છે, પરંતુ તેને આ યુદ્ધમાંથી બેઠાં થતાં એક દશકો લાગી જશે. ઈરાન તો ઠીક અમેરિકા પણ મોંઘવારીના મારથી બચી શક્યું નથી.અમેરિકન પ્રમુખ ડોનાલ્ડ ટ્રમ્પે શરૂઆતમાં તમાચો મારીને ગાલ લાલ રાખ્યો ને અમેરિકાને તો કોઈ જ ફરક નહીં પડે એવા દાવા કર્યા હતા, પરંતુ હવે અમેરિકામાં ગેસ-પેટ્રોલ-ડીઝલના ભાવ વધી જતાં મોંઘવારી ત્રણ વર્ષની ટોચે છે. અમેરિકામાં મોંઘવારી વધવાથી સ્થિતિ કાબૂ બહાર ન જાય તે માટે ફેડરલ રિઝર્વ બેંકે વ્યાજ દરો ઘટાડવા જોઈએ એવી ભલામણ થવા માંડી છે. નાણા વિભાગે જાહેર કરેલા આંકડાનું માનીએ તો અમેરિકામાં વાર્ષિક ફુગાવો ૩.૫ ટકા વધ્યો છે. ત્રણ વર્ષમાં આટલો ઉછાળો પહેલી વખત જોવા મળ્યો છે. ટ્રમ્પ ઈનકાર કરતા રહ્યા ને ગેસ-પેટ્રોલિયમની કિંમતોમાં ૨૧ ટકાનો વધારો ઝીંકાઈ ગયો.અમેરિકાની જેમ યુરોપના દેશોમાં પણ ગેસ-પેટ્રોલિયમના ભાવ બેકાબૂ બન્યાં છે. યુરોપના દેશોએ રશિયાનો ગેસ ખરીદવાનું બંધ કર્યું એ પછી અમેરિકાએ ગેસ આપવાનું શરૂ કર્યું હતું. અમેરિકા યુરોપના દેશોને વર્ષે ૮૦થી ૧૦૦ અબજ ક્યૂબિક મીટર ગેસ આપે છે. અમેરિકામાં જ ભાવ કાબૂમાં ન હોય ત્યારે યુરોપમાં તો ભાવ અંકુશમાં ક્યાંથી રહે? અમેરિકન નિકાસકારોએ યુદ્ધ વચ્ચે ગેસના ભાવ વધારી દીધા એટલે યુરોપમાં પણ અમેરિકાની જેમ ગેસ-પેટ્રોલિયમના ભાવ છેલ્લાં બે મહિનામાં વધ્યા છે ને એના આધારિત ઉર્જાના ભાવમાં પણ વધારો ઝીંકાયો છે.

The post ઈરાન-અમેરિકાના યુદ્ધની અસરને લીધે દુનિયાભરમાં મોંઘવારીથી લોકો ત્રાહિમામ appeared first on Police Story.

સ્ટીલ, એલ્યુમિનિયમ અને ઓટોમોબાઈલ જેવા ક્ષેત્રો પરના ટેરિફ હાલમાં ચાલુ રહેશે કારણ કે તેઓ સુપ્રીમ કોર્ટના આ દાયરામાં આવતા નથી

(સંપૂર્ણ સમાચાર સેવા)
વોશિગ્ટન, તા.૮ મે ૨૦૨૬ — ઈરાન સાથેના યુદ્ધની સ્થિતિ અને વૈશ્વિક અનિશ્ચિતતા વચ્ચે અમેરિકન પ્રમુખ ડોનાલ્ડ ટ્રમ્પની વેપાર નીતિઓને મોટો કાયદાકીય ફટકો પડ્યો છે. અમેરિકન ટ્રેડ કોર્ટે ટ્રમ્પ પ્રશાસન દ્વારા લાદવામાં આવેલા તાજેતરના ૧૦% ગ્લોબલ ટેરિફને ગેરબંધારણીય અને ગેરકાનૂની ગણાવ્યા છે. અદાલતે સ્પષ્ટ કર્યું છે કે ૧૯૭૦ના દાયકાના વેપાર કાયદાનો ઉપયોગ કરીને આટલા વ્યાપક ટેક્સ લાદવા ઉચિત નથી.ફેબ્રુઆરી મહિનામાં ટ્રમ્પે ‘ટ્રેડ એક્ટ ૧૯૭૪’ ની કલમ ૧૨૨ નો સહારો લઈને આ ટેરિફ લાગુ કર્યા હતા. આ કલમ હેઠળ માત્ર ‘પેમેન્ટ ડેફિસિટ’ (ચુકવણી સંતુલન ખાધ) અથવા ડોલરની કિંમતમાં ભારે ઘટાડા જેવી કટોકટીમાં જ ૧૫૦ દિવસ માટે શુલ્ક લાદવાની મંજૂરી મળે છે. જોકે, ઇન્ટરનેશનલ ટ્રેડ કોર્ટે ૨-૧ ની બહુમતીથી ચુકાદો આપ્યો કે પ્રમુખએ આ દાયકાઓ જૂના કાયદાનો ખોટો ઉપયોગ કર્યો છે. અમેરિકા હાલમાં કોઈ પેમેન્ટ સંકટનો સામનો કરી રહ્યું નથી, તેથી આ પગલું ગેરકાનૂની છે.કોર્ટે આ મામલે મહત્વનો આદેશ આપતા જણાવ્યું છે કે જે પક્ષકારોએ આ ટેરિફને પડકાર્યો હતો, તેમને આગામી ૫ દિવસની અંદર વસૂલવામાં આવેલા ટેક્સના નાણાં પરત કરવામાં આવે. ઉલ્લેખનીય છે કે ૨૪ રાજ્યો અને અનેક નાના ઉદ્યોગ સાહસિકોએ આ ટેક્સ સામે મોરચો માંડ્યો હતો. જોકે, સ્ટીલ, એલ્યુમિનિયમ અને ઓટોમોબાઈલ જેવા ક્ષેત્રો પરના ટેરિફ હાલમાં ચાલુ રહેશે કારણ કે તેઓ સુપ્રીમ કોર્ટના આ ડાયરામાં આવતા નથી.ટ્રમ્પ પ્રશાસને આ ટેરિફનો બચાવ કરતા વાર્ષિક ૧.૨ ટ્રિલિયન ડોલરની વેપાર ખાધનો હવાલો આપ્યો હતો. હવે એવી શક્યતા છે કે અમેરિકન ન્યાય વિભાગ આ ચુકાદાને ‘યુએસ કોર્ટ ઓફ અપીલ્સ’ માં પડકારશે. અગાઉ પણ અપીલ કોર્ટે ટેરિફ વિવાદમાં ટ્રમ્પ પ્રશાસન વિરુદ્ધ ચુકાદો આપ્યો હતો. ઈરાન સાથેની યુદ્ધ જેવી સ્થિતિ વચ્ચે આ આર્થિક નિર્ણય ટ્રમ્પ માટે મોટી નબળાઈ સાબિત થઈ શકે છે.

The post ઈરાન યુદ્ધ વચ્ચે ટ્રમ્પને મોટો ફટકોઃ ૧૦% ગ્લોબલ ટેરિફ રદ appeared first on Police Story.

ઈરાની અધિકારીઓએ આરોપ લગાવ્યો છે કે અમેરિકાએ સીઝફાયરનું ઉલ્લંઘન કર્યું છે અને સામાન્ય નાગરિક વિસ્તારોને નિશાન બનાવ્યા છે

(સંપૂર્ણ સમાચાર સેવા)
વોશિગ્ટન, તા.૮ મે ૨૦૨૬ — અમેરિકા અને ઈરાન વચ્ચે સીઝફાયર હોવા છતાં બંને દેશો વચ્ચે યુદ્ધ જેવી સ્થિતિ સર્જાઈ છે. ઈરાને હોર્મુઝ સ્ટ્રેટમાં અમેરિકન ડિસ્ટ્રોયર (યુદ્ધ જહાજો) ને નિશાન બનાવીને મિસાઈલ હુમલા કર્યા બાદ અમેરિકાએ આક્રમક જવાબી કાર્યવાહી કરી છે. અમેરિકન સેનાએ ઈરાનના કેશમ અને બંદર અબ્બાસ સ્થિત સૈન્ય ઠેકાણાઓ પર બોમ્બમારો કર્યો છે. અમેરિકન પ્રમુખ ડોનાલ્ડ ટ્રમ્પે આ હુમલાઓને ‘લવ ટેપ’ ગણાવી ઈરાનને કડક ચેતવણી આપી છે.અમેરિકી સેન્ટ્રલ કમાન્ડના જણાવ્યા અનુસાર, ૭ મેના રોજ જ્યારે અમેરિકન નૌકાદળના ગાઈડેડ-મિસાઈલ ડિસ્ટ્રોયર હોર્મુઝ સ્ટ્રેટના આંતરરાષ્ટ્રીય જળમાર્ગ પરથી પસાર થઈ રહ્યા હતા, ત્યારે ઈરાને ડ્રોન, મિસાઈલો અને નાની નૌકાઓ મોકલીને તેમને નિશાન બનાવ્યા હતા.

અમેરિકાએ આ તમામ ખતરાઓને નષ્ટ કરીને ઈરાનના તે સૈન્ય ઠેકાણાઓ પર હુમલો કર્યો જ્યાંથી મિસાઈલ અને ડ્રોન લોન્ચ કરવામાં આવ્યા હતા. આ હુમલાઓમાં કમાન્ડ એન્ડ કંટ્રોલ સેન્ટર અને ગુપ્તચર સર્વેલન્સ કેન્દ્રોને પણ ધ્વસ્ત કરવામાં આવ્યા છે.ડોનાલ્ડ ટ્રમ્પની પ્રતિક્રિયાટ્રમ્પે સોશિયલ મીડિયા પર દાવો કર્યો હતો કે અમેરિકાના ત્રણ વિશ્વસ્તરીય ડિસ્ટ્રોયર સુરક્ષિત રીતે પસાર થયા છે. તેમણે કહ્યું કે ઈરાની ડ્રોનને હવામાં જ સળગાવી દેવામાં આવ્યા હતા, જે સમુદ્રમાં કોઈ પતંગિયું પોતાની કબર તરફ જતું હોય તેમ પડતા દેખાયા હતા. ટ્રમ્પે વધુમાં ઉમેર્યું કે ઈરાન કોઈ સામાન્ય દેશ નથી અને ત્યાંનું નેતૃત્વ યોગ્ય રીતે કામ કરી રહ્યું નથી.અમેરિકી હુમલા બાદ ઈરાને તેની રાજધાની તેહરાનમાં એર ડિફેન્સ સિસ્ટમ સક્રિય કરી દીધી છે. ઈરાની અધિકારીઓએ આરોપ લગાવ્યો છે કે અમેરિકાએ સીઝફાયરનું ઉલ્લંઘન કર્યું છે અને સામાન્ય નાગરિક વિસ્તારોને નિશાન બનાવ્યા છે. ઈરાને પણ વળતો પ્રહાર કરવાની તૈયારી દર્શાવી છે. દરમિયાન, સમાચાર મળ્યા છે કે અમેરિકન વિદેશ મંત્રી માર્કો રુબિયોએ પશ્ચિમ એશિયા માટે ૨૫.૮ અબજ ડોલરના હથિયાર પેકેજને મંજૂરી આપી દીધી છે, જે સૂચવે છે કે સ્થિતિ આગામી દિવસોમાં વધુ ગંભીર બની શકે છે.

The post ઈરાનના કેશમ અને બંદર અબ્બાસ પર અમેરિકાના ભીષણ હુમલા appeared first on Police Story.

ચૂંટણીમાં હાર માટે જવાબદારી સ્વીકારવાને બદલે પક્ષે હવે કાર્યકરો પર દોષનો ટોપલો ઢોળવાનું શરૂ કર્યું હોય તેમ જણાય છે

(સંપૂર્ણ સમાચાર સેવા)
ગાંધીનગર,તા.૭ મે ૨૦૨૬ — રાજ્યમાં સ્થાનિક ચૂંટણીમાં સુપડા સાફ થતાં કોંગ્રેસે શિસ્તભંગનું હથિયાર ઉગામ્યું છે. જેમાં પક્ષ વિરોધી પ્રવૃત્તિ બદલ ૨૦ કાર્યકરોને ૬ વર્ષ માટે સસ્પેન્ડ કરવાના આદેશ ગાંધીનગર જિલ્લા કોંગ્રેસ સમિતિ દ્વારા કરવામાં આવ્યા છે. ગુજરાત સ્થાનિક સ્વરાજ્યની ચૂંટણી ૨૦૨૬માં કોંગ્રેસના દેખાવ બાદ હવે પક્ષમાં આંતરકલહ સપાટી પર આવ્યો છે. ગાંધીનગર જિલ્લામાં ભાજપના ભવ્ય વિજય અને કોંગ્રેસના રકાસ બાદ ગાંધીનગર જિલ્લા કોંગ્રેસ સમિતિએ આકરા પગલાં ભરવાની શરૂઆત કરી છે. ચૂંટણીમાં હાર માટે જવાબદારી સ્વીકારવાને બદલે પક્ષે હવે કાર્યકરો પર દોષનો ટોપલો ઢોળવાનું શરૂ કર્યું હોય તેમ જણાય છે. ગાંધીનગર જિલ્લા કોંગ્રેસ પ્રમુખ અરવિંદસિંહ સોલંકી દ્વારા એક સત્તાવાર પત્ર જાહેર કરીને ૨૦ જેટલાં પદાધિકારીઓ અને કાર્યકરોને પક્ષના પ્રાથમિક સભ્યપદેથી ૬ વર્ષ માટે સસ્પેન્ડ કરી દેવામાં આવ્યા છે. આ પત્રમાં આરોપ લગાવવામાં આવ્યો છે કે, આ સભ્યોએ પક્ષ વિરોધી પ્રવૃત્તિ કરી છે અને કોંગ્રેસના માન્ય ઉમેદવારોને નુકસાન પહોંચાડ્યું છે. સસ્પેન્ડ થયેલા સભ્યોમાં દહેગામ, માણસા અને કલોલ વિસ્તારના અગ્રણીઓનો સમાવેશ થાય છે.

કોંગ્રેસની આ હાર પાછળ સંગઠનની નબળાઈ અને નેતૃત્વનો અભાવ મુખ્ય કારણો છે. જોકે, પક્ષે આત્મમંથન કરવાને બદલે પાયાના કાર્યકરોને નિશાન બનાવ્યા છે. એકસાથે ૨૦ સભ્યોને દૂર કરવાથી આગામી ૨૦૨૭ની વિધાનસભા ચૂંટણી પહેલા કોંગ્રેસનું માળખું વધુ નબળું પડી શકે છે. સસ્પેન્ડ થયેલા કાર્યકરોમાં ભારે રોષ જોવા મળી રહ્યો છે. તેઓનું કહેવું છે કે, ’પક્ષના ઉચ્ચ નેતૃત્વની નિષ્ફળતાને છુપાવવા માટે અમને બલિનો બકરો બનાવવામાં આવ્યા છે.’

આ યાદીમાં જગતસિંહ ચૌહાણ (દહેગામ), દિપાબહેન ઠાકોર (માણસા), અને ફરીદાબાનુ મલેક (કલોલ) જેવા નામોનો સમાવેશ થાય છે. આ તમામ સભ્યો હવે આગામી સમયમાં શું રણનીતિ અપનાવે છે તેના પર સૌની નજર રહેશે.

The post ગાંધીનગર કોંગ્રેસમાં ૨૦ સભ્યોને ઘરભેગા કરાયા appeared first on Police Story.

આ અકસ્માત અત્યંત ગંભીર હતો, પરંતુ સદનસીબે કોઈ મોટી જાનહાનિના સમાચાર પ્રાપ્ત થયા નથી

(સંપૂર્ણ સમાચાર સેવા)
અમદાવાદ,તા.૭ મે ૨૦૨૬ — શહેરના નારણપુરા ક્રોસિંગ પાસે આજે એક મોટી અકસ્માતની ઘટના ઘટી છે. પૂરપાટ ઝડપે આવતી AMTS બસની અચાનક બ્રેક ફેલ થઈ જતા બસ બેકાબૂ બની હતી અને રસ્તા પર પસાર થઈ રહેલા અનેક વાહનોને અડફેટે લીધા હતા.

પ્રત્યક્ષદર્શીઓના જણાવ્યા અનુસાર, AMTS બસે સામે આવી રહેલી એક કાર અને ત્રણ બાઇકને જોરદાર ટક્કર મારી હતી. બસની ટક્કર એટલી પ્રચંડ હતી કે કાર ફંગોળાઈને સીધી રોડના ડિવાઈડર પર ચડી ગઈ હતી. અકસ્માતને પગલે રોડ પર વાહનોના કુરચેકુરચા ઉડી ગયા હતા અને લોકોમાં ભયનો માહોલ ફેલાયો હતો.

આ અકસ્માત અત્યંત ગંભીર હતો, પરંતુ સદનસીબે કોઈ મોટી જાનહાનિના સમાચાર પ્રાપ્ત થયા નથી. વાહનચાલકોનો આબાદ બચાવ થયો છે. જોકે, વાહનોને મોટા પ્રમાણમાં નુકસાન પહોંચ્યું છે. અકસ્માત બાદ નારણપુરા ક્રોસિંગ પર ટ્રાફિક જામના દ્રશ્યો સર્જાયા હતા.

The post નારણપુરા ક્રોસિંગ પાસે AMTS બસની બ્રેક ફેલ થતા અકસ્માત appeared first on Police Story.