રીલ લાઈફમાં એક્ટર, રિયલ લાઈફમાં કાતિલ: અમિતાભ-આમિર સાથે સ્ક્રીન શેર કરનારો આજીવન કેદનો કેદી ૧૨ વર્ષે ઝડપાયો

કોઈ ફિલ્મી પટકથાને પણ ટક્કર મારે તેવી એક સનસનાટીપૂર્ણ ઘટનામાં અમદાવાદ ક્રાઈમ બ્રાન્ચે એક એવા શાતિર ગુનેગારની ધરપકડ કરી છે, જે છેલ્લા એક દાયકાથી પોલીસની નજર સામે જ બોલિવૂડની મોટી ફિલ્મોમાં અભિનય કરી રહ્યો હતો. વર્ષ ૨૦૦૫ના એક હત્યા કેસમાં આજીવન કેદની સજા ભોગવી રહેલો અને ૨૦૧૪થી પેરોલ જમ્પ કરી નાસતો ફરતો પાકો કેદી હેમંત મોદી આખરે કાનૂનના સિકંજામાં આવી ગયો છે. ઘી કાંટા મેટ્રો સ્ટેશન પાસેથી જ્યારે તેની ધરપકડ થઈ, ત્યારે તેની અસલી ઓળખ જાણીને ખુદ પોલીસ અધિકારીઓ પણ દંગ રહી ગયા હતા.

લોહિયાળ ભૂતકાળ અને જેલમાંથી પલાયનઆ ગુનાઈત કહાનીની શરૂઆત વર્ષ ૨૦૦૫માં અમદાવાદના નરોડા વિસ્તારથી થઈ હતી, જ્યાં હેમંત મોદીએ એક ઘાતકી હત્યાના ગુનાને અંજામ આપ્યો હતો. ગુનાની ગંભીરતા જોતા કોર્ટે તેને આજીવન કેદની સજા ફટકારી મહેસાણા જેલમાં મોકલી આપ્યો હતો. લાંબા જેલવાસના ડરથી હેમંત માનસિક રીતે તૂટી ગયો હતો અને તેણે પોતાની પત્ની સાથે છૂટાછેડા પણ લઈ લીધા હતા. વર્ષ ૨૦૧૪માં તેને કોર્ટ તરફથી પેરોલ મળ્યા. જેલની બહાર આવતાની સાથે જ તેણે કાયમ માટે ગાયબ થઈ જવાનો માસ્ટરપ્લાન બનાવી લીધો અને મુંબઈ ભાગી ગયો. નામ બદલ્યું અને બની ગયો બોલિવૂડનો ‘સ્પંદન મોદી’. મુંબઈ પહોંચીને હેમંતે પોતાનો લોહિયાળ ભૂતકાળ હંમેશા માટે દાટી દીધો. તેણે પોતાની નવી ઓળખ ‘સ્પંદન મોદી’ તરીકે ઊભી કરી અને માયાનગરીમાં એક સ્ટ્રગલિંગ એક્ટર તરીકે નાટકો અને ફિલ્મોમાં નસીબ અજમાવવાનું શરૂ કર્યું.

આશ્ચર્યની વાત એ છે કે, જે સમયે ગુજરાત પોલીસના ચોપડે તે એક મોટો વોન્ટેડ ગુનેગાર હતો, તે જ સમયે તે દેશના સુપરસ્ટાર્સ સાથે સ્ક્રીન શેર કરી રહ્યો હતો. ઇન્ટરનેટ મૂવી ડેટાબેઝ (IMDb) પર પણ તેને ‘સ્પંદન મોદી’ તરીકે જ ક્રેડિટ આપવામાં આવી છે. તેણે નીચે મુજબની જાણીતી ફિલ્મો અને સીરિયલોમાં નાની-મોટી ભૂમિકાઓ ભજવી હતી.

ફિલ્મનું નામ સહ-કલાકારો
ઠગ્સ ઓફ હિન્દુસ્તાન અમિતાભ બચ્ચન, આમિર ખાન
જયેશભાઈ જોરદાર રણવીર સિંહ
૫૩મું પાનું ગુજરાતી ચલચિત્ર

આ ઉપરાંત તેણે અનેક હિન્દી સીરિયલો અને નાટકોમાં પણ કામ કર્યું, પરંતુ કોઈને અણસાર સુદ્ધા ન આવ્યો કે આ પડદા પાછળનો અસલી ચહેરો એક હત્યારાનો છે.

મેટ્રો સ્ટેશન પાસે ક્રાઈમ બ્રાન્ચની એક્શન: છેલ્લી ઘડીએ પણ ‘એક્ટિંગ’

ક્રાઈમ બ્રાન્ચને ચોક્કસ બાતમી મળી હતી કે લાંબા સમયથી ફરાર આ કેદી અમદાવાદમાં જ કોઈને મળવા આવવાનો છે. પોલીસે તાત્કાલિક ટેક્નિકલ સર્વેઇલન્સ અને તેના જૂના સંપર્કોની કડીઓ જોડીને ઘી કાંટા મેટ્રો સ્ટેશન નજીક મજબૂત જાળ ગોઠવી દીધી.જ્યારે ક્રાઈમ બ્રાન્ચે તેને ઘેરી લીધો, ત્યારે પણ તેણે પોતાની ‘અભિનય કળા’નો ઉપયોગ કરી પોલીસને ગેરમાર્ગે દોરવાનો અને નિર્દોષ હોવાનો સ્વાંગ રચવાનો છેલ્લો પ્રયાસ કર્યો હતો.જો કે, અનુભવી પોલીસ અધિકારીઓ સામે તેની આ એક્ટિંગ ચાલી નહીં. કડકાઈથી પૂછપરછ કરતા જ તેની તમામ હોશિયારી ગાયબ થઈ ગઈ અને તેણે પોતાનો ગુનો કબૂલ કરી લીધો. હાલ પોલીસે આ ‘રીલ લાઈફ એક્ટર’ અને ‘રિયલ લાઈફ ક્રિમિનલ’ને ફરી જેલના સળિયા પાછળ ધકેલવાની કાયદેસરની કાર્યવાહી હાથ ધરી છે.