નવી દિલ્હી: દેશની રાજધાની દિલ્હીમાં આજે રાજકીય પારો ચરમસીમાએ પહોંચ્યો છે. ચૂંટણી પંચ દ્વારા હાથ ધરાયેલી મતદાર યાદી સુધારણા પ્રક્રિયામાં મોટા પાયે ગેરરીતિઓ આચરવામાં આવી હોવાના અને લાખો મતદારોના નામ ગાયબ કરી દેવાયાના ગંભીર આક્ષેપો સાથે વિપક્ષી I.N.D.I.A. ગઠબંધને આરપારની લડાઈનું બિગુલ ફૂંક્યું છે. મુખ્ય ચૂંટણી કમિશનરના તાત્કાલિક રાજીનામાની માંગ સાથે વિપક્ષ દ્વારા દિલ્હીના ઐતિહાસિક રામલીલા મેદાન ખાતે ‘વોટ બચાવો, દેશ બચાવો’ શીર્ષક હેઠળ વિશાળ શક્તિપ્રદર્શન યોજવામાં આવ્યું છે.
કોંગ્રેસ અધ્યક્ષના નિવાસસ્થાનેથી પદયાત્રાનો પ્રારંભ
મહારેલી પૂર્વે વિપક્ષી એકતાનો સંદેશ આપવા માટે તમામ ઘટક પક્ષોના દિગ્ગજ નેતાઓ કોંગ્રેસ અધ્યક્ષ મલ્લિકાર્જુન ખડગેના નિવાસસ્થાને એકઠા થયા હતા. ત્યાંથી વિપક્ષના નેતા રાહુલ ગાંધી, સમાજવાદી પાર્ટીના અધ્યક્ષ અખિલેશ યાદવ, તૃણમૂલ કોંગ્રેસ પ્રમુખ મમતા બેનરજી, પ્રિયંકા ગાંધી, કે.સી. વેણુગોપાલ અને તેજસ્વી યાદવ સહિતના વરિષ્ઠ નેતાઓ ખુલ્લી બસો અને પદયાત્રા મારફતે કનોટ પ્લેસ અને મિંટો રોડ થઈ રામલીલા મેદાન ખાતે પહોંચ્યા હતા.
“ડબલ એન્જિન હવે ડબલ ઝીરો”: અખિલેશ યાદવના પ્રહારો
રેલી સ્થળે પહોંચી સમાજવાદી પાર્ટીના નેતા અખિલેશ યાદવે ઉત્તર પ્રદેશ સરકાર અને કેન્દ્ર પર આકરા પ્રહારો કર્યા હતા. તેમણે જનાદેશ સાથે ચેડાં કરવાનો આરોપ લગાવતા જણાવ્યું હતું કે, વહીવટીતંત્ર દ્વારા અન્યાયની તમામ સીમાઓ ઓળંગી દેવાઈ છે. રિકાઉન્ટિંગ અને પરાજયના ડરથી લાખો મતો રદ કરવામાં આવ્યા છે. ડબલ એન્જિનની વાતો કરતી સરકાર હવે જનતા સામે ‘ડબલ ઝીરો’ પુરવાર થઈ ચૂકી છે.
દિગ્ગજ નેતાઓ અને સામાજિક ચહેરાઓની હાજરી
આ આંદોલનમાં ઝારખંડના મુખ્યમંત્રી હેમંત સોરેન, તેલંગાણાના મુખ્યમંત્રી રેવંત રેડ્ડી, ટીએમસી નેતા અભિષેક બેનરજી તેમજ વિવિધ રાજ્યોના પ્રતિનિધિઓ મોટી સંખ્યામાં ઉપસ્થિત રહ્યા છે. આ ઉપરાંત પ્રખ્યાત અભિનેતા પ્રકાશ રાજે પણ સોશિયલ મીડિયાના માધ્યમથી નાગરિકોને લોકશાહી અને ચૂંટણી પ્રક્રિયાના રક્ષણ કાજે આ વિરોધ પ્રદર્શનમાં જોડાવવા અપીલ કરી હતી.
રામલીલા મેદાન ખાતે કડક સુરક્ષા અને ૧૪ ઝોન
જનમેદનીને ધ્યાનમાં રાખીને દિલ્હી પોલીસે સમગ્ર રામલીલા મેદાનને ૧૪ વિશેષ સુરક્ષા ઝોનમાં વિભાજિત કરી દીધું છે. દરેક ઝોનની જવાબદારી એસીપી રેન્કના અધિકારીઓને સોંપવામાં આવી છે.
સુરક્ષા બળ: ૩,૦૦૦થી વધુ દિલ્હી પોલીસના જવાનો અને ૧૦,૦૦થી વધુ પેરામિલિટરી (CAPF) જવાનો તહેનાત કરાયા છે.
નિરીક્ષણ: ૨૦૦થી વધુ સીસીટીવી કેમેરા, બોડી વોર્ન કેમેરા અને મેટલ ડિટેક્ટરથી સઘન ચેકિંગ કરવામાં આવી રહ્યું છે.
મંચ વ્યવસ્થા: મેદાનમાં બે મુખ્ય સ્ટેજ બનાવાયા છે; જેમાંથી એક રાષ્ટ્રીય કક્ષાના નેતાઓ માટે અને બીજું સ્ટેજ પ્રાદેશિક પ્રતિનિધિઓ માટે ફાળવાયું છે.
ટ્રાફિક ડાયવર્ઝન અને વ્યવસાયિક અપીલ
રેલીના પગલે દિલ્હી ટ્રાફિક પોલીસે સવારે ૧૦ થી સાંજે ૫ વાગ્યા સુધી આઈટીઓ, દિલ્હી ગેટ, રાજઘાટ અને અજમેરી ગેટ તરફના માર્ગો પર વાહનવ્યવહાર ડાયવર્ટ કર્યો છે. દર્દીઓની સુવિધા માટે LNJP અને GB પંત હોસ્પિટલ તરફ જવા માટે ખાસ ઈમરજન્સી કોરિડોર ખુલ્લો રાખવામાં આવ્યો છે.
બીજી તરફ, વેપારી મંડળો દ્વારા વેપારને અસર પહોંચવાની વ્યક્ત કરાયેલી ચિંતાના જવાબમાં રાહુલ ગાંધીએ દિલ્હી આવેલા તમામ કાર્યકર્તાઓને રેલી સાથે સ્થાનિક વેપારીઓ પાસેથી ખરીદી કરી તેમને આર્થિક સહયોગ આપવા આહ્વાન કર્યું હતું.